ງານປະມູນລົດການນຳ 14 ຄັນໄດ້ເງິນເຂົ້າງົບປະມານ 11 ຕື້ກວ່າກີບ

ຜູ້ນຳຂັ້ນສູງຂອງລາວນຳລົດປະຈຳຕຳແໜ່ງເຂົ້າປະມູນເພື່ອເອົາເງິນເຂົ້າຄັງຊາດ

ງານປະມູນຊື້ລົດທີ່ເຄີຍຮັບໃຊ້ການນຳລະດັບສູງສຸດ ສປປ ລາວ, ໄດ້ຈັດຂຶ້ນໃນວັນທີ 28 ກຸມພາ 2017, ທີ່ຫໍປະຊຸມແຫ່ງຊາດ (ຫຼັກ 6) ໂດຍການເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ

ທ່ານ ຮອງລັດຖະມົນຕີ, ຄະນະຮັບຜິດຊອບການຖອນການປະມູນຂາຍ ແລະ ການປະກອບລົດປະຈຳຕຳແໜ່ງຂອງການນຳລະດັບສູງ, ບັນດານັກທຸລະກິດທັງພາກລັດ ແລະ ເອກະຊົນເຂົ້າຮ່ວມປະມູນ 55 ຫົວໜ່ວຍ. ໃນພິທີທ່ານ ຄຳລາວັນ ຈັນທະລາວັນ ຮອງລັດຖະມົນຕີ, ຮອງຫົວໜ້າຫ້ອງວ່າການ ສຳນັກ ງານນາຍົກລັດຖະມົນຕີ ໄດ້ຂຶ້ນຜ່ານລະບຽບຂອງການປະມູນຂາຍພາຫະນະແບບເປີດກວ້າງ ແນໃສ່ປະຕິບັດການປະມູນໃຫ້ຖືກຕ້ອງຕາມລະບຽບຫລັກການ, ຮັບປະກັນຄວາມໂປ່ງໃສ ແລະ ມີປະສີດທິຜົນສູງ. ເງື່ອນໄຂຂອງຜູ້ເຂົ້າຮ່ວມປະມູນມີຄື: ຜູ້ທີ່ເຂົ້າຮ່ວມປະມູນແມ່ນຕ້ອງມາລົງທະບຽນດ້ວຍຕົນເອງເຊິ່ງຕ້ອງມີບັດປະຈຳຕົວ ຫລື ໜັງສືຜ່ານແດນ ຖ້າບໍ່ສາມາດເຂົ້າຮ່ວມດ້ວຍຕົນເອງ ແມ່ນສາມາດມອບສິດໃຫ້ຜູ້ອື່ນມາແທນໄດ້ແຕ່ຕ້ອງມີໃບມອບສິດຜ່ານການຈັດຕັ້ງທີ່ກ່ຽວຂ້ອງ; ຜູ້ທີ່ຊະນະການປະມູນຕ້ອງມີຄວາມສາມາດຊຳລະເງິນຄ່າຊື້ລົດທີ່ຕົນປະມູນໄດ້ໂດຍຊຳລະເປັນເງິນສົດ, ໃນກໍລະນີທີ່ຜູ້ຊະນະການປະມູນຫາກບໍ່ມີຄວາມຮັບຜິດຊອບຕໍ່ລາຄາທີ່ຕົນໄດ້ສະເໜີໄປນັ້ນແມ່ນຈະຖືກປັບໃໝ 10% ຂອງມູນຄ່າທີ່ສະເໜີມາໃນການປະມູນພ້ອມທັງຖືກດຳເນີນຄະດີຕາມລະບຽບກົດໝາຍ.

ສ່ວນລົດທີ່ເຄີຍຮັບໃຊ້ການນຳລະດັບສູງສຸດ ທີ່ຄະນະຮັບຜິດຊອບການຖອນການປະມູນຂາຍ ແລະ ການປະກອບລົດປະຈຳຕຳແໜ່ງຂອງການນຳລະດັບສູງ ຄັ້ງນີ້ ມີທັງໝົດ 14 ຄັນ ຄື: ລົດ BMW ລຸ້ນ 730 LI ຈຳນວນ 7 ຄັນ ໃນລາຄາເລີ່ມຕົ້ນ 830 ລ້ານກີບ ແລະ BENZ ລຸ້ນ S350 ຈຳນວນ 7 ຄັນ ໃນລາຄາເລີ່ມຕົ້ນ 500 ລ້ານກີບ ເຊິ່ງການປະມູນລົດແຕ່ລະຄັນດຳເນີນໄປຈົນກວ່າໄດ້ຜູ້ທີ່ສະເໜີໃຫ້ລາຄາສູງສຸດເປັນຜູ້ສຸດທ້າຍ.
ລົດທີ່ເປີດປະມູນເປັນຄັນທຳອິດຍີ່ຫໍ້ BMW ແມ່ນລົດເຄີຍນຳໃຊ້ປະຈຳຕຳແໜງຂອງທ່ານ ບຸນຍັງ ວໍລະຈິດ ປະທານປະເທດແຫ່ງ, ໂດຍແມ່ນທ່ານ ຄຳລຽງ ສັບໄຊທອງ ຕາງຫນ້າບໍລິສັດ BV Group ຊະນະການປະມູນໄປໃນລາຄາ 890 ລ້ານກີບ.

ຄັນທີ 2 ຍີ່ຫໍ້ Benz ແມ່ນລົດທີ່ເຄີຍໃຊ້ເປັນລົດປະຈຳຕຳແຫນ່ງຂອງທ່ານ ຈັນສີ ໂພສີຄຳ ຫົວຫນ້າຄະນະຈັດຕັ້ງສູນກາງພັກ, ໂດຍແມ່ນທ່ານ ນາງ ດວງຈັນ ຫລຽນສະກຸນ ຊະນະການປະມູນໃນລາຄາ 520 ລ້ານກີບ.

ຄັນທີ 3 ຍີ່ຫໍ້ BMW ແມ່ນລົດປະຈຳຕຳແຫນ່ງຂອງທ່ານ ທອງລຸນ ສີສຸລິດ ນາຍົກ ລັດຖະມົນຕີ ໂດຍແມ່ນທ່ານ ທອງລິດ ກິ່ງແກ້ວອຸດົມ ຊະນະການປະມູນໃນລາຄາ 1.330 ລ້ານກີບ ເປັນລາຄາສູງກວ່າຫມູ່ໃນການປະມູນຄັ້ງນີ້.

ຄັນທີ 4 ຍີ່ຫໍ້ Benz ແມ່ນລົດປະຈຳຕຳແຫນ່ງຂອງທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ໂດຍແມ່ນທະນາຄານ ພົງສະຫວັນ ຊະນະການປະມູນໃນລາຄາ 600 ລ້ານກີບ.

ຄັນທີ 5 ຍີ່ຫໍ້ BMW ແມ່ນລົດປະຈໍາຕຳແຫນ່ງຂອງທ່ານ ປານີ ຢາທໍ່ຕູ້ ກຳມະການກົມ ປະທານສະພາແຫ່ງຊາດໂດຍແມ່ນທ່ານນາງ ບົວແກ້ວ ວົງສະຫມໍລະພູມ ຊະນະການປະມູນໃນລາຄາ 970 ລ້ານກີບ.

ຄັນທີ 6 ຍີ່ຫໍ້ Benz ແມ່ນລົດປະຈຳຕຳແຫນ່ງຂອງທ່ານພົນໂທ ແສງນວນ ໄຊຍະລາດ ຮອງປະທານສະພາແຫ່ງຊາດ ໂດຍແມ່ນທ່ານນາງ ວັນສີ ສຸວັນນະແສງ ຕາງຫນ້າບໍລິສັດສຸກປະເສີດ ຊະນະການປະມູນໃນລາຄາ 780 ລ້ານກີບ.

ຄັນທີ 7 ຍີ່ຫໍ້ BMW ແມ່ນລົດປະຈຳຕຳແຫນ່ງຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ປະທານອົງການກວດກາພັກ ແລະ ລັດຖະບານ ຊຶ່ງແມ່ນທ່ານ ຄຳຮຸ່ງ ໄຊຈະເລີນ ຊະນະການປະມູນໃນລາຄາ 950 ລ້ານກີບ.

ຄັນທີ 8 ຍີ່ຫໍ້ Benz ລົດທີ່ເຄີຍໃຊ້ເປັນລົດປະຈຳຕຳແຫນ່ງຂອງທ່ານ ສົມແພງ ຄຳມີ ຮອງປະທານສະພາແຫ່ງຊາດ, ໂດຍແມ່ນທ່ານ ຄຳຫລ້າ ບຸດຈະເລີນ ຊະນະການປະມູນໃນລາຄາ 580 ລ້ານກີບ.

ຄັນທີ 9 ຍີ່ຫໍ້ BMW ລົດຂອງທ່ານ ພັນຄຳ ວິພາວັນ ຮອງປະທານປະເທດ, ໂດຍແມ່ນທ່ານ ຟຸກ ກິ່ງແກ້ວອຸດົມ ຕາງຫນ້າບໍລິສັດ ຈະເລີນເຊກອງ ຊະນະການປະມູນໃນລາຄາ 1.300 ລ້ານກີບ.

ຄັນທີ 10 ຍີ່ຫໍ້ Benz ລົດສຳຮອງຮັບໃຊ້ການນຳໂດຍແມ່ນຜູ້ຕາງຫນ້າຈາກບໍລິສັດ ປີໂຕຣຫລ່ຽມເທດດີ່ງ ລາວມະຫາຊົນ ຊະນະການປະມູນໃນລາຄາ 660 ລ້ານກີບ.

ຄັນທີ 11 ຍີ່ຫໍ້ BMW ລົດຂອງທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ໂດຍແມ່ນທ່ານ ຄຳຮຸ່ງ ຫລຽນຈະເລີນຊະນະການປະມູນໃນລາຄາ 850 ລ້ານກີບ.

ຄັນທີ 12 ຍີ່ຫໍ້ Benz ເປັນລົດສຳຮອງຮັບໃຊ້ການນຳ, ໂດຍແມ່ນທ່ານ ປະສິດ ສຸພາບ ຊະນະການປະມູນໃນລາຄາ 600 ລ້ານກີບ.

ລົດຄັນທີ 13 ຍີ່ຫໍ້ BMW ແມ່ນລົດສຳຮອງຮັບໃຊ້ການນຳ, ໂດຍແມ່ນທ່ານນາງ ພະນົມວັນ ປັນຍາສິດ, ຊະນະການປະມູນໃນລາຄາ 850 ລ້ານກີບ.

ລົດຄັນທີ 14 ຍີ່ຫໍ້ Benz ແມ່ນລົດສຳຮອງຮັບໃຊ້ການນຳ, ໂດຍແມ່ນທ່ານ ປະສິດ ສຸພາບ, ຊະນະການປະມູນໃນລາຄາ 720 ລ້ານກີບ.

ງານປະມູນຊື້ລົດທີ່ເຄີຍຮັບໃຊ້ການນຳລະດັບສູງສຸດ ສປປ ລາວ ເປັນຄັ້ງທຳອິດ ແລະ ສາມາດນຳເງິນເຂົ້າງົບປະມານລວມມູນຄ່າທັງໝົດ 11.600 ລ້ານກີບ.

ແຫຼ່ງທີ່ມາ: http://www.mof.gov.la

Be the first to comment

Leave a Reply

Your email address will not be published.


*