ຕຳຫຼວດຈີນ ຈັບກຸມຜູ້ກ່ຽວຂ້ອງກັບ OneCoin ໄດ້ 35 ຄົນ

ອັດຕາການກວດລ້າງຫຼຽນ OneCoin ໃນແຕ່ລະປະເທດໄດ້ເພີ່ມປະລິມານຂຶ້ນເລື້ອຍໆບໍ່ວ່າຈະເປັນປະເທດຟິນແລນທີ່ກໍ່ມີການຕັ້ງຊຸດສືບສວນຂຶ້ນມາໂດຍສະເພາະ, ຂະນະດຽວກັນລັດທະບານປະເທດອີຕາລີກໍ່ໄດ້ປະກາດຢ່າງເປັນທາງການວ່າ OneCoin ນັ້ນເຂົ້າຂ່າຍຫຼອກລວງ ລວມທັງປະເທດອິນເດຍທີ່ມີການຈັບກຸມແມ່ທີມຂອງທຸລະກິດດັ່ງກ່າວໄປແລ້ວເຊັ່ນກັນ.

ໃນຕອນນີ້ກໍ່ເປັນເວລາຂອງປະເທດຈີນທີ່ກໍ່ເລີ່ມມີການຈິງຈັງທຳລາຍທຸລະກິດເຄືອຂ່າຍສະກຸນເງິນດິຈິຕອລຜິດກົດໝາຍ ໂດຍອ້າງອີງຈາກເວັບໄຊທ໌ BehindMLM ທີ່ລາຍງານວ່າເຈົ້າໜ້າທີ່ຕຳຫຼວດໃນມົນທົນຫູໜານໄດ້ທຳການເຂົ້າສືບສວນ ແລະ ຈັບກຸມຜູ້ທີ່ມີຄວາມກ່ຽວຂ້ອງກັບທຸລະກິດດັ່ງກ່າວຈຳນວນ 35 ຄົນ.

ພາຍຫຼັງການຈັບກຸມຕົວພວກກ່ຽວທັງໝົດນັ້ນ ທາງເຈົ້າໜ້າທີ່ຕຳຫຼວດໄດ້ຕັ້ງຂໍ້ຫາດ້ານອາດສະຍາກຳ ແລະ ພວກກ່ຽວກໍ່ໄດ້ຖືກຄວບຄຸມຕົວຂຶ້ນສານໃນເມືອງ ຈູໂຈວ ຫວ່າງບໍ່ດົນມານີ້. ສານແຫ່ງເມືອງຈູໂຈວໄດ້ຕັດສິນວ່າ: “OneCoin ບໍ່ໄດ້ນອນໃນຈຳພວກສະກຸນເງິນ ຫຼື cryptocurrency ແຕ່ຢ່າງໃດ”.

“OneCoin ບໍ່ໄດ້ຖືກອອກໃຫ້ໂດຍລັດທະບານຈີນ ຫຼື ກະຊວງການເງິນຂອງຈີນ, ບໍ່ມີສະຖານະທີ່ຖືກກົດໝາຍ, ບໍ່ສາມາດໃຊ້ໃນການຮັບຮອງ-ຊຳລະໜີ້ສິນ ແລະ ບໍ່ສາມາດໃຊ້ເປັນສະກຸນເງິນໃນປະເທດຈີນໄດ້”. ສານໃນເມືອງຈູໂຈວກ່າວ.

ນອກນັ້ນ, ທາງການຈີນໄດ້ຕັ້ງຂໍ້ຫາຜູ້ທີ່ກ່ຽວຂ້ອງທັງ 35 ຄົນວ່າ: “ຫຼອກລວງເງິນຄົນອື່ນ” ມູນຄ່າກວ່າ 10,000-20 ລ້ານຫຍວນ ຫຼື ປະມານ 1,546-3 ລ້ານໂດລາສະຫະລັດ. ໃນເງິນຈຳນວນນີ້ ມີເງິນ 13.6 ລ້ານຫຍວນ (ປະມານ 2.1 ລ້ານໂດລາ) ຖືກຍຶດ ແລະ ກູ້ຄືນກັບມາໄດ້. ຜູ້ຖືກຫາທັງ 35 ຄົນໄດ້ຖືກສານຕັດສິນໃຫ້ມີຄວາມຜິດໂດຍມີໂທດຕັ້ງແຕ່ການຕັດອິດສະຫຼະພາບໄປຈົນເຖິງຖືກຄຸກເປັນເວລາ 2-3 ປີ ແລະ ມີໂທດປັບໄໝ 10,000 ຫຍວນ ໄປຈົນເຖິງ 5 ລ້ານຫຍວນ (1,546 ໂດລາ ຫາ 773,455 ໂດລາ).

Be the first to comment

Leave a Reply

Your email address will not be published.


*