ທະນາຄານໃນຍີປຸ່ນກຽມເປີດຕົວເງິນດິຈິຕອລເປັນຂອງຕົນເອງ ຊື່ວ່າ: “J-Coin”

ກຸ່ມ Consortium ຂອງທະນາຄານໃນປະເທດຍີປຸ່ນຫຼາຍໆແຫ່ງກຳລັງວາງແຜນເປີດຕົວຫຼຽນດິຈິຕອລສຳລັບປະເທດຍີປຸ່ນ ເພື່ອນຳມາໃຊ້ແທນທະນະບັດໃນປັດຈຸບັນ ໂດຍມີີເປົ້າໝາຍເພື່ອໃຫ້ປະຊາຊົນຫຼຸດການໃຊ້ເງິນສົດໃຫ້ໜ້ອຍລົງ.

ກຸ່ມທະນາຄານດັ່ງກ່າວ ນຳໂດຍທະນາຄານທີ່ໃຫຍ່ທີ່ສຸດໃນປະເທດຢ່າງ Mizuho Financial Group ແລະ Japan Post Bank ມີແຜນການທີ່ຈະເປີດຕົວຫຼຽນດິຈິຕອລຊື່ວ່າ: “J-Coin” ໃນຊ່ວງງານກິລາໂອລິມປິກທີ່ຈະຖືກຈັດຂຶ້ນໃນປີ 2020 ທີ່ນະຄອນຫຼວງໂຕກຽວ.

ໂຄງການສ້າງເງິນດິຈິຕອລດັ່ງກ່າວໄດ້ຮັບການສະໜັບສະໜູນຈາກທະນາຄານກາງໃນປະເທດຍີປຸ່ນ ແລະ ໜ່ວຍງານຜູ້ອອກກົດໝາຍທາງດ້ານການເງິນ ໂດຍມີແຜນການເພື່ອໃຫ້ປະຊາຊົນຍີປຸ່ນໃຊ້ຫຼຽນດັ່ງກ່າວໃຊ້ຈ່າຍຊື້ສິນຄ້າ ແລະ ບໍລິການອື່ນໆຜ່ານທາງໂທລະສັບມືຖື.

ປັດຈຸບັນ, ມີການເຮັດທຸລະກຳດ້ວຍເງິນສົດ ປະມານ 70% ຂອງທຸລະກຳທາງການເງິນທັງໝົດທີ່ເກີດຂຶ້ນໃນຍີປຸ່ນ ເຊິ່ງທາງທະນາຄານເລີ່ມເບິ່ງວ່າເປັນບັນຫາ ເນື່ອງຈາກເງິນສົດນັ້ນມີຄ່າບຳລຸງຮັກສາທີ່ແພງບໍ່ວ່າຈະທາງຝັ່ງທະນາຄານ ຫຼື ທາງຝັ່ງລັດທະບານ, ໂດຍສະເພາະທະນາຄານທີ່ຕ້ອງຈ່າຍເງິນໃນການຂົນສົ່ງທະນະບັດ, ຄ່າດູແລຮັກສາ ແລະ ຄ່າກວດສອບເງິນເປັນຈຳນວນຫຼາຍ ໃນຂະນະທີ່ທາງຝັ່ງລັດທະບານກໍ່ມີຄວາມສ່ຽງດ້ານການສູນເສຍການເກັບພາສີສຳລັບເງິນສົດທີ່ບໍ່ໄດ້ຖືກຈົດບັນທຶກໄວ້ ຫຼື ເງິນສົດທີ່ຖືກນຳໄປເຮັດທຸລະກຳຜິດກົດໝາຍອື່ນໆ.

ກຸ່ມ consortium ທະນາຄານດັ່ງກ່າວ ຄາດວ່າອັດຕາການປັບໃຊ້ຫຼຽນເງິນດິຈິຕອລຕົວໃໝ່ທີ່ຈະຊ່ວຍເພີ່ມມູນຄ່າປະມານ 10 ພັນລ້ານເຢນ (ປະມານ 90 ລ້ານໂດລາ) ເຂົ້າໄປໃນເສດຖະກິດ ໂດຍ J-Coin ນັ້ນຈະຖືກແລກປ່ຽນກັບເງິນເຢນດ້ວຍອັດຕາ 1:1 (1 J-Coin ຕໍ່ 1 ເຢນ).

ສິ່ງທີ່ໜ້າສົນໃຈບໍ່ໜ້ອຍໄປກວ່າກັນນັ້ນກໍ່ຄື ລັດທະບານຂອງຫຼາຍໆປະເທດໃນແຖບເອີຣົບກຳລັງພະຍາຍາມທີ່ຈະອັບເກຣດກຸ່ມໃນເຄືອ Euro Zone ໃຫ້ເປັນ “ສັງຄົມໄຮ້ເງິນສົດ” ດ້ວຍການນຳເອົາເທັກໂນໂລຢີເງິນດິຈິຕອລມາໃຊ້ ເຊິ່ງອ້າງອີງໄດ້ຈາກລາຍງານອັດຕາການໃຊ້ເງິນສົດທີ່ຫຼຸດລົງເຖິງ 27% ນັບຕັ້ງແຕ່ປີ 2011 ເປັນຕົ້ນມາໃນປະເທດສະວີເດັນ ລວມເຖິງປະເທດເດັນມາກທີ່ມີການອະນຸຍາດໃຫ້ຮ້ານຄ້າລວມທັງຮ້ານອາຫານ, ປ້ຳນ້ຳມັນ ແລະ ຮ້ານຂາຍເສື້ອຜ້າຢຸດການຮັບເງິນສົດໄດ້. ຂະນະທີ່ທະນາຄານກາງຂອງປະເທດເກົາຫຼີນັ້ນໄດ້ກ່າວວ່າ ພວກເຂົາມີແຜນການທີ່ຈະເຮັດໃຫ້ປະເທດຕົນເອງເປັນສັງຄົມໄຮ້ເງິນສົດພາຍໃນປີ 2020 ໃຫ້ໄດ້.

ປະເທດທີ່ຄ້າຍກັບວ່າຈະນຳໜ້າສັງຄົມໄຮ້ເງິນສົດໄປຢ່າງເປັນຮູບປະທຳນັ້ນຄົງເປັນປະເທດ “ຈີນ” ທີ່ປັດຈຸບັນມີບໍລິສັດທີ່ໃຫ້ບໍລິການດ້ານການຊຳລະເງິນໃຫຍ່ໆຢູ່ສອງບໍລິສັດດ້ວຍກັນຄື: Alibaba ແລະ Tencent ທີ່ມີການນຳເອົາລະບົບ  epayment ເຂົ້າໄປໃສ່ໃນແອັພຢ່າງ Alipay ແລະ WeChat ໂດຍມີລາຍງານວ່າປັດຈຸບັນຊາວຈີນສ່ວນໃຫຍ່ນັ້ນອອກຈາກບ້ານໄປຊື້ສິນຄ້າໂດຍທີ່ບໍ່ຕ້ອງພົກພາເງິນສົດອີກຕໍ່ໄປ, ອີກທັງກ່ອນໜ້ານີ້ຍັງມີລາຍງານວ່າທະນາຄານກາງແຫ່ງປະເທດຈີນໄດ້ກໍ່ຕັ້ງສະຖາບັນວິໄຈເງິນດິຈິຕອລເພື່ອພັດທະນາຫຼຽນດິຈິຕອລເປັນຂອງຕົນເອງດ້ວຍເຊັ່ນກັນ.

Be the first to comment

Leave a Reply

Your email address will not be published.


*