ບັນຫາຄວາມຂັດແຍ້ງລະຫວ່າງ ອາເມລິກາ ແລະ ເກົາຫຼີເໜືອ ເຮັດໃຫ້ມູນຄ່າເງິນດິຈິຕອລພຸ່ງສູງຂຶ້ນເລື້ອຍໆ

ສົງຄາມຈິດຕະສາດລະຫວ່າງສອງປະເທດເກົາຫຼີເໜືອກັບສະຫະລັດອາເມລິກາ ສົ່ງຜົນໃຫ້ຄວາມຕ້ອງການເງິນດິຈິຕອລ ຫຼື Cryptocurrency ນັ້ນເພີ່ມສູງຂຶ້ນເລື້ອຍໆ

CEO ຂອງບໍລິສັດ InvestFeed Inc. ໂດຍແມ່ນທ່ານ ຣອນ ເຊີເນສກີ ໄດ້ອອກມາກ່າວວ່ານັກລົງທຶນນັ້ນກຳລັງມີທ່າອ່ຽງຫັນມາຖືເງິນດິຈິຕອລກັນຫຼາຍຂຶ້ນເພື່ອກະຈ່າຍຄວາມສ່ຽງຂອງພວກເຂົາຖ້າຫາກວ່າຕະຫຼາດຫຼັກຊັບຢູ່ໃນຊ່ວງຂາລົງ ພ້ອມທັງກ່າວຕື່ມອີກວ່າ Cryptocurrency ຫຼື ເງິນດິຈິຕອລນັ້ນພວມໄດ້ຮັບຄວາມນິຍົມ ແລະ ໄດ້ຮັບການຍອມຮັບກວ້າງຂວາງຂຶ້ນ ເນື່ອງຈາກມັນມີຄວາມສະດວກທັງມີຜົນກະທົບຕໍ່ກັບຊັບສິນຕົວອື່ນໜ້ອຍກວ່າ.

ດັ່ງທີ່ຫຼາຍທ່ານທີ່ຕິດຕາມຂ່າວ ກໍ່ຄົງຈະຮູ້ກັນແລ້ວວ່າ ຊາວເກົາຫຼີໃຕ້ເລີ່ມຫັນມາຖືຄອງ Ethereum (ອີເທີຣຽມ) ກັນຫຼາຍຂຶ້ນ ໂດຍເມື່ອອາທິດທີ່ຜ່ານມານັ້ນ ປະລິມານການຊື້-ຂາຍພຸ່ງສູງເຖິງ 2.6 ພັນລ້ານໂດລາສະຫະລັດ ເຊິ່ງອັດຕາການເພີ່ມສູງຂຶ້ນຂອງລາຄານັ້ນຄິດເປັນສ່ວນຮ້ອຍເທົ່າກັບ 60% ຖືວ່າສູງກວ່າ Bitcoin ອີກ. ສາເຫດຫຼັກໆທີ່ເຮັດໃຫ້ລາຄາຂອງ Ethereum ພຸ່ງສູງແບບນັ້ນມາຈາກການຊື້-ຂາຍໃນປະເທດເກົາຫຼີໃຕ້ ໂດຍຄູ່ເງິນ KRW/ETH (ວອນ/ອີເທີຣຽມ) ນັ້ນກວມເອົາ 40% ຊອງປະລິມານການຊື້ຂາຍ Ethereum ທັງໝົດ ເຮັດໃຫ້ມັນກາຍເປັນຄູ່ສະກຸນເງິນທີ່ມີມູນຄ່າການຊື້-ຂາຍສູງກວ່າຕະຫຼາດອື່ນໆ.

ປັດໃຈທີ່ເຮັດໃຫ້ Bitcoin ມີລາຄາສູງເຖິງ 4,000 ໂດລາໃນຕອນທ່ຽງຂອງມື້ວານນີ້ ຖືເປັນຄັ້ງທຳອິດໃນປະຫວັດສາດເລີຍກໍ່ວ່າໄດ້ ໃນຂະນະທີ່ລາຄາຂອງ Ethereum ກໍ່ພຸ່ງສູງຂຶ້ນມາເຖິງ 30% ໃນຮອບ 4 ວັນ.

ຈະເຫັນໄດ້ວ່າທັງສອງສະກຸນເງິນບໍ່ວ່າຈະເປັນ Bitcoin ຫຼື Ethereum ລ້ວນແຕ່ມີອັດຕາເພີ່ມຂຶ້ນສູງໃນບໍ່ເທົ່າໃດອາທິດທີ່ຜ່ານມາ ໂດຍສະເພາະຄວາມສຳເລັດຂອງການແຍກຕົວຂອງ Bitcoin.

ປັດຈຸບັນ, ສັງເກດເຫັນໄດ້ວ່າຜູ້ຄົນສ່ວນໃຫຍ່ຫັນໄປລົງທຶນໃນ Cryptocurrency ກັນຫຼາຍຂຶ້ນ ເຖິງແມ່ນວ່າ Bitcoin ນັ້ນຈະມີຄວາມຜັນຜວນຂອງລາຄາທີ່ຂ້ອນຂ້າງສູງກວ່າ “ຄຳແທ້” ເຖິງ 10 ເທົ່າ ແຕ່ຜູ້ຊ່ຽວຊານກໍ່ຍັງຄົງເບິ່ງວ່າ Cryptocurrency ນັ້ນສາມາດປົກປ້ອງຜູ້ໃຊ້ງານຈາກການແຊກແຊງຂອງລັດຖະບານ ລວມໄປເຖິງການຊ່ວຍແກ້ບັນຫາໄພເງິນເຟີ້ໄດ້ເປັນຢ່າງດີ.

ອີກສາເຫດໜຶ່ງທີ່ເຮັດໃຫ້ລາຄາຂອງ Bitcoin ພຸ່ງແບບນີ້ ແມ່ນເຮົາຕ້ອງກັບຄືນໄປເບິ່ງສະຖິຕິຈາກປີ 2016 ທີ່ຜ່ານມາ ຈະເຫັນວ່ານັກລົງທຶນ ແລະ ນັກເກງກຳໄລໃນຕະຫຼາດທຶນ (ຕະຫຼາດຫຼັກຊັບ) ບໍ່ວ່າຈະເປັນສະຫະລັດອາເມລິກາ ຫຼື ຈີນຕ່າງກໍ່ເລີ່ມທີ່ຈະເບິ່ງເຫັນຄືກັນວ່າ “ບິທຄອຍ໌ເປັນສະກຸນເງິນທີ່ປອດໄພ” ໂດຍຖ້າຫວນກັບໄປຄິດເຖິງຄວາມບໍ່ມີປະສິດທິພາບໃນການບໍລິຫານປະເທດນັບທັງເສດຖະກິດ ແລະ ການເມືອງຂອງລັດຖະບານ ຜູ້ຄົນກໍ່ມັກຈະຄິດເຖິງ Bitcoin ເປັນອັບດັບຕົ້ນໆ.

ຜູ້ຊ່ຽວຊານທາງການເງິນບາງທ່ານເຊື່ອວ່າ: “ເງິນແທ້” (Fiat) ກຳລັງຈະກ້າວສູ່ຍຸກແຫ່ງການຖົດຖອຍ ໂດຍສະກຸນເງິນທີ່ບໍ່ຂຶ້ນກັບໃຜ (Decentralized) ເຊັ່ນ: Bitcoin ແລະ Altcoin ອື່ນໆນັ້ນກຳລັງຈະມາເຮັດໃຫ້ວົງການການເງິນໂລກສັ່ນຄອນ.

 

 

 

Be the first to comment

Leave a Reply

Your email address will not be published.


*