ບິທຄອຍນ໌ (Bitcoin) ສະກຸນເງິນດິຈິຕອລແຫ່ງໂລກອະນາຄົດທີ່ຄວນຮູ້ໄວ້

ບິທຄອຍນ໌ ເງິນຕາດິຈິຕອລທີ່ແພງກວ່າຄຳແທ້

ບິທຄອຍນ໌ ມີຊື່ເອີ້ນຢ່າງເປັນທາງການຄື: “Bitcoin” ມັນເປັນສະກຸນເງິນດິຈິຕອລ (Cryptocurrency) ທີ່ກຳລັງມີບົດບາດສຳຄັນໃນຍຸກປັດຈຸບັນ ແລະ ກໍ່ກຳລັງຈະກາຍເປັນອີກທາງເລືອກໃໝ່ຂອງການທຳທຸລະກຳທາງການເງິນໃນອະນາຄົດອັນໃກ້.

ບິທຄອຍນ໌ ມີຫົວໜ່ວຍທີ່ໃຊ້ສັນຍາລັກແທນຕົວເອງໃນທາງເທັກນິກຄື BTC, ບິທຄອຍນ໌ ເປັນຫົວໜ່ວຍສະກຸນເງິນອີເລັກໂທຣນິກທີ່ມີຄ່າສູງທີ່ສຸດໃນບັນດາ Altcoin ຊະນິດອື່ນໆໃນປັດຈຸບັນ (ເພາະມັນມີມູນຄ່າສູງກວ່າຄຳ), ໃນວັນນີ້ທີ່ກຳລັງຂຽນບົດຄວາມຢູ່ 1 BTC ມີມູນຄ່າເທົ່າກັບ 1238.18 ໂດລາສະຫະລັດ. ຍ້ອນມັນມີມູນຄ່າໃນຕົວເອງສູງຫຼາຍ ແລະ ຍັງມີແນວໂນ້ມທີ່ຈະສູງຂຶ້ນເລື້ອຍໆຕາມອຸປະສົງ ແລະ ອຸປະທານຂອງຕະຫຼາດ ຈິ່ງເຮັດໃຫ້ມັນກາຍເປັນທີ່ຕ້ອງການຂອງນັກລົງທຶນ ຫຼື ນັກເກງກຳໄລໃນໂລກ Cyber.

ບິທຄອຍນ໌ ຖືກຄົ້ນພົບເປັນຄັ້ງທຳອິດໃນປີ 2009 ໂດຍນັກຄະນິດສາດນິລະນາມໃນຊື່ Satoshi Nakamoto (ຊາໂຕຊິ ນາກາໂມໂຕະ) ດ້ວຍເຫດນີ້ເອງ, ຫົວໜ່ວຍວັດແທກເງິນຕານ້ອຍສຸດຂອງບິທຄອຍນ໌ຈິ່ງເອີ້ນກັນວ່າ “ຊາໂຕຊິ”

ການທີ່ຈະໄດ້ບິທຄອຍນ໌ມານັ້ນແມ່ນມາຈາກການຂຸດເໝືອງ (Mining) ແບບດຽວກັນກັບການຂຸດເໝືອງແຮ່ໃນໂລກແຫ່ງຄວາມເປັນຈິງ ແຕ່ການຂຸດເໝືອງບິທຄອຍນ໌ໃນທີ່ນີ້ເປັນການໃຊ້ເຄື່ອງຄັອມພິວເຕີທີ່ອອກແບບມາສະເພາະເທົ່ານັ້ນໃນການຂຸດຫາບິທຄອຍນ໌ຜ່ານທາງອິນເຕີເນັດເຊິ່ງເຄື່ອງນີ້ມີລາຄາແພງເຖິງແພງຫຼາຍ, ກິນໄຟຫຼາຍ ແລະ ເຄື່ອງຄັອມພິວເຕີທີ່ໃຊ້ຂຸດບິທນີ້ຈະບໍ່ສາມາດໃຊ້ການອື່ນໄດ້. 

ບິທຄອຍນ໌ ເປັນສະຖາປັດຕະຍະກຳເທັກໂນໂລຢີທາງຄະນິດສາດ 8 ຕົວເລກ ທີ່ຕ້ອງໃຊ້ຄັອມພິວເຕີໃນການຖອດລະຫັດເພື່ອໃຫ້ໄດ້ມັນມາ ເຊິ່ງມັນບໍ່ແມ່ນເລື່ອງ່າຍທີ່ຈະໄດ້ຄອບຄອງ. ເພາະສະນັ້ນ, ມັນຈິ່ງເປັນສະກຸນເງິນຕາທີ່ມີຄວາມປອດໄພສູງທີ່ສຸດ (ສູງກວ່າເງິນທີ່ຝາກໄວ້ກັບທະນາຄານ) ເນື່ອງຈາກການເຈາະລະບົບ (Hack) ເຮັດໄດ້ຍາກ ຍ້ອນທຸກໆຄັ້ງທີ່ມີການທຳທຸລະກຳກ່ຽວກັບບິທຄອຍນ໌ມັນຈະຕ້ອງໄດ້ຮັບການກວດສອບ, ຢືນຢັນ ໂດຍເຄື່ອງຄັອມພິວເຕີທຸກເຄື່ອງໃນເຄືອຂ່າຍ (ເຊິ່ງມີຫຼາຍແສນລ້ານໜ່ວຍ) ແລະ ກໍ່ຈະໄດ້ຮັບການບັນທຶກລົງໃນບຼ໋ອກເຊນ (Blockchain) ທີ່ປຽບສະເໝືອນຫີບເກັບບິທຄອຍນ໌ເອົາໄວ້ຢ່າງປອດໄພ.

ການທຳທຸລະກຳດ້ວຍບິທຄອຍນ໌ມີຄ່າໃຊ້ຈ່າຍທີ່ຕໍ່າຫຼາຍເມື່ອທຽບກັບການທຳທຸລະກຳຜ່ານທາງທະນາຄານ, ເພາະມັນບໍ່ຜ່ານສະຖາບັນການເງິນໃດໆ, ບໍ່ມີທະນາຄານກາງຄອຍຄວບຄຸມ ຫຼື ກວດສອບ, ການໂອນ-ຖອນ-ຊຳລະແມ່ນເຮັດໄດ້ໃນເວລາອັນສັ້ນ ແລະ ທີ່ສຳຄັນມັນບໍ່ຈຳກັດວົງເງິນໃນການໂອນເຊິ່ງຈຸດນີ້ເງິນສົດເຮັດບໍ່ໄດ້.

ປັດຈຸບັນບໍລິສັດຍັກໃຫຍ່ຢ່າງ Microsoft ທີ່ມີບໍລິສັດລູກຄື Microsoft Azure ກໍ່ໄດ້ຮອງຮັບການຊຳລະເງິນດ້ວຍບິທຄອຍນ໌ຢ່າງເປັນທາງການແລ້ວ ແຕ່ສະກຸນເງິນທີ່ Microsoft Azure ຮອງຮັບນັ້ນເປັນເງິນດິຈິຕອລສະກຸນໜຶ່ງໃນປະກຸ່ມບິທຄອຍນ໌ ຫຼື ເປັນສະກຸນເງິນທາງເລືອກ (Altcoin) ທີ່ເອີ້ນວ່າ: “Ethereum” (ອີເທີຣຽມ) ມີຫົວໜ່ວຍເງິນຕາແມ່ນ ETH.

ໃນບົດຄວາມນີ້ເຮົາຈະຂໍກ່າວເຖິງບິທຄອຍນ໌ແບບຫຍໍ້ໆໃຫ້ຮູ້ກັນກ່ອນ ແຕ່ໃນບົດຄວາມຕໍ່ໄປເຮົາຈະມາລົງເລິກເຖິງຄວາມສຳຄັນຂອງມັນ ແລະ ການຫາເງິນຈາກມັນວ່າຈະເຮັດແນວໃດ ກະລຸນາຕິດຕາມອ່ານໃນບົດຄວາມໜ້າ.

Be the first to comment

Leave a Reply

Your email address will not be published.


*