ບໍລິສັດ Start Up ໃນສິງກະໂປຮ່ວມມືກັບ Visa ອອກບັດເດບິດ Bitcoin

ອີກສິ່ງໜຶ່ງທີ່ຍັງເປັນເລື່ອງທ້າທາຍສໍາລັບ Bitcoin ແລະ ຫຼຽນ Cryptocurreny ໃນປັດຈຸບັນ ຄືການທີ່ຈະເຮັດໃຫ້ມັນສາມາດນໍາໃຊ້ໄດ້ໃນຊີວິດປະຈຳວັນຕົວຈິງ ແລະ ແນວຄິດທີ່ຈະເຮັດໃຫ້ມັນເຮັດວຽກຮ່ວມກັບບັດເດບິດຢ່າງບັດ Visa ໄດ້.

ກ່ອນໜ້ານີ້ກໍ່ມີຫຼາຍບໍລິສັດທີ່ໂດດເຂົ້າມາຈັບຈອງພື້ນທີ່ຕະຫຼຼາດນີ້ ບໍ່ວ່າຈະເປັນ Xapo ຫຼື ແມ່ນກະທັ້ງ BitPay ແຕ່ນັ້ນກໍ່ຍັງມີບໍລິສັດເພື່ອບ້ານເຮົາຈາກສິງກະໂປ ຊື່ວ່າ TenX ທີ່ເບິ່ງຄືວ່າຈະບໍ່ຕ້ອງການໃຫ້ຕະຫຼາດນີ້ຫຼຸດມືເຊັ່ນດຽວກັນ.

ຄວາມພິເສດຢ່າງໜຶ່ງຂອງ TenX ຄືຜູ້ໃຊ້ງານສາມາດແປງຫຼຽນ Bitcoin ແລະ altcoin ອື່ນໆໃຫ້ກາຍເປັນສະກຸນເງິນແທ້ເຊັ່ນ: ໂດລາ, ເຢນ ແລະ ຍູໂຣ…. ໂດຍທາງບໍລິສັດໄດ້ກ່າວວ່າຈະຄິດໄລ່ຄ່າທຳນຽມຈາກຜູ້ໃຊ້ພຽງແຕ່ 2% ຕໍ່ທຸລະກໍາທົ່ານັ້ນ ພ້ອມກັນນີ້ກໍ່ອາດຈະກໍານົດວົງເງິນໄວ້ທີ່ $ 2,000 ຕໍ່ປີ ເຊິ່ງປະຈຸບັນມີຜູ້ໃຊ້ງານສັ່ງບັດດັ່ງກ່າວແລ້ວຫຼາຍກວ່າ 10,000 ບັດ.

ເປົ້າໝາຍຫຼັກຂອງ TenX ຄືຕ້ອງການໃຫ້ເງິນດິຈິຕອລເປັນທີ່ນິຍົມ ແລະ ໃຊ້ງານງ່າຍ ທ່າມກາງຄວາມຜັນຜວນສູງຂອງຕະຫຼາດໃນປັດຈຸບັນນີ້ລວມທັງບັນຫາວົງໃນຂອງນັກພັດທະນາ ໂດຍສະເພາະແມ່ນ ບິດຄອຍນ໌ (Bitcoin) ທີ່ກໍາລັງເກີດບັນຫາຄວາມແຕກແຍກຂອງກຸ່ມນັກພັດທະນາຫຼັກ ແລະ ກຸ່ມນັກນັກຂຸດ ກ່ຽວກັບບັນຫາການອະພິປາຍເລື່ອງຫົນທາງໃນການແກ້ໄຂບັນຫາການຂະຫຍາຍບຼ໋ອກ (Scaling) ຈົນສົ່ງຜົນເຮັດໃຫ້ລາຄາຕົກຢ່າງຮຸນແຮງເມື່ອຫຼາຍອາທິດກ່ອນ ກ່ອນທີ່ຈະຟື້ນຕົວກັບມາເມື່ອ BIP 91 (ການເປີດສັນຍານສະໜັບສະໜູນ SegWit2X)  ຖືກລ໋ອກອິນແລ້ວ.

TenX ໄດ້ສາງໂປຣແກຣມມືຖືທີ່ເຮັດວຽກຄ້າຍຄືກັບກະເປົ໋າເງິນຫຼຽນຄຣີບໂຕ (Cryptocurreny Wallet) ທີ່ເຊື່ອມຕໍ່ກັບບັດຂອງ Visa ເຊິ່ງຜູ້ໃຊ້ງານສາມາດນຳໄປຮູດຊື້ສິນຄ້າຢູ່ໃສກໍ່ໄດ້ໃນໂລກນີ້ທີ່ມີສັນຍາລັກ Visa ພ້ອມກັບຈ່າຍອອກເປັນຫຼຽນຄຣິບໂຕ (ເງິນດິຈິຕອລ).

“ທ່ານກຳລັງນຳເອົາໂລກສອງໜ່ວຍມາລວມກັນ ຄື: ໂລກແຫ່ງກາງເວັນ ແລະ ໂລກແຫ່ງກາງຄືນ, ເມື່ອທ່ານຈ່າຍອອກມາເປັນ Cryptocurreny ເຮົາຈະທຳການແລກມັນໃຫ້ກາຍເປັນຄ່າເງິນຫຼັກ ແລະ ຈ່າຍມັນໃຫ້ກັບ Visa ທັນທີ” ກ່າວໂດຍທ່ານ Julian Hosp ໜຶ່ງໃນຜູ້ຮ່ວມກໍ່ຕັ້ງ TenX.

ນອກນັ້ນ, ທ່ານ Julian ຍັງໄດ້ກ່າວວ່າ: “ທຸລະກຳນັ້ນຈະຖືກຈັດການດ້ວຍຄວາມໄວສູງທີ່ສຸດ ແລະ ຈະບໍ່ມີການຫັກຄ່າທຳນຽມເພີ່ມນອກເໜືອຈາກອັດຕາແລກປ່ຽນ ພຽງປະມານ 0.15%-0.2% ໂດຍບັດຂອງ TenX ນັ້ນຍັງຮອງຮັບຫຼຽນ Alcoin ອື່ນໆອີກເປັນຕົ້ນແມ່ນ Erhereum, Dash ແລະ Augur ອີກດ້ວຍ ເຊິ່ງມີແຜນການທີ່ຈະເພີ່ມອີກປະມານ 11 ຫຼຽນພາຍໃນສິ້ນປີນີ້”.

ປັດຈຸບັນ, TenX ໄດ້ຊ່ວຍໃຫ້ຜູ້ໃຊ້ງານເຮັດທຸລະກຳຜ່ານບັດປະມານ 100,000 ໂດລາຕໍ່ເດືອນ ເຊິ່ງພາຍໃນທ້າຍປີ 2018 ບໍລິສັດຕັ້ງເປົ້າໝາຍໄວ້ທີ່ 100 ລ້ານໂດລາຕໍ່ເດືອນ. TenX ມີຂໍ້ໄດ້ປຽບຢູ່ບ່ອນວ່າ “ເລີ່ມກ່ອນເປັນເຈົ້າທຳອິດໃນພາກພື້ນອາຊີຕາເວັນອອກສຽງໃຕ້” ແຕ່ອີກບໍ່ດົນພວກເຂົາອາດຈະຕ້ອງພົບກັບຄູ່ແຂ່ງກະເປົາໜັກຈາກກຸ່ມນັກລົງທຶນອິດສະຫຼະ ຫຼື ບໍລິສັດການເງິນທີ່ອາດຈະເຂົ້າມາຮ່ວມລົງແຂ່ງຂັນໃນຕະຫຼາດນີ້ນຳ. ຫວ່າງບໍ່ດົນມານີ້, TenX ກໍ່ໄດ້ເປີດທຳການລະດົມທຶນຜ່ານ ICO ໂດຍການເປີດຂາຍຫຼຽນເມື່ອເດືອນທີ່ຜ່ານມາ ເຊິ່ງເຮັດໃຫ້ພວກເຂົາສາມາດລະດົມທຶນໄປໄດ້ເຖິງ 80 ລ້ານໂດລາ ໂດຍເຄິ່ງນຶ່ງຂອງມັນຈະຖືກໃຊ້ເພື່ອຂະຫຍາຍກິດຈະການ ໃນຂະນະທີ່ອີກສ່ວນທີ່ເຫຼືອນັ້ນຈະຖືກໃຊ້ເພື່ອເພີ່ມສະພາບຄ່ອງໃຫ້ກັບທຸລະກິດ.

ໃນລະຫວ່າງການລະດົມທຶນນັ້ນ TenX ຍັງໄດ້ຮັບເງິນລົງທຶນຈາກ Angel Investor ເຊິ່ງເປັນນັກລົງທຶນຜູ້ໃຈດີທີ່ເບິ່ງເຫັນອະນາຄົດຂອງ Start Up ແລະ ຊ່ວຍອອກເງິນໃຫ້ໃນຂັ້ນເລີ່ມຕົ້ນຂອງການສ້າງຕັ້ງບໍລິສັດປະມານ 120,000 ໂດລາ ແລະ ອີກ 1 ລ້ານໂດລາຈາກ venture capital ນາມວ່າ  Fenbushi Captital ທີ່ມີຜູ້ກໍ່ຕັ້ງຮ່ວມກັບ Ethereum ຄື Vitalik Buterun ມາເປັນຮຸ້ນສ່ວນອີກດ້ວຍ ໂດຍ TenX ນັ້ນຫວັງຈະໃຫ້ໄດ້ເງິນຄືນ ແລະ ສາມາດສ້າງກຳໄລໄດ້ໃນອີກ 2 ປີຂ້າງໜ້າຈາກການຂະຫຍາຍທຸລະກິດ.

“ສິ່ງໜຶ່ງທີ່ພວກເຮົາໃຫ້ບໍລິການກໍ່ຄື ທ່ານສາມາດແລກປ່ຽນຫຼຽນຄຣິບໂຕໃນແອັບຂອງເຮົາໄດ້ເລີຍ ແລະ ຖ້າຫາກເຮົາເຮັດແບບນີ້ເຮົາຈະກາຍເປັນຜູ້ນຳຕະຫຼາດ ພ້ອມທັງມີກຳໄລມະຫາສານ”.

Be the first to comment

Leave a Reply

Your email address will not be published.


*