ຟິລິບປິນ ປະກາດ Curfew ພື້ນທີ່ເກາະມິນດາເນົາ ເປັນເວລາ 60 ວັນ ຈັບຕາຍກຸ່ມ ໄອເອສ

ໂຄສົກປະຈຳສຳນັກງານນາຍົກລັດຖະມົນຕີ ທ່ານ ເອີເນສໂຕ ອະເບລລາ ໄດ້ອອກມາຖະແຫຼງການວ່າ ທ່ານ ໂຣດີໂກ ດູເຕີເຕ ປະທານາທິບໍດີຂອງຟິລິບປິນ ໄດ້ປະກາດໃຫ້ທົ່ວທັງ ເກາະມິນດາເນົາ ເມືອງມາຣາວີ ເປັນພື້ນທີ່ຕ້ອງຫ້າມ ຫຼື ເປັນເຂດຫ້າມບຸກຄົນເຂົ້າອອກຢ່າງເດັດຂາດ (Curfew) ເປັນເວລາ 60 ວັນ

ສາເຫດເນື່ອງມາຈາກກຸ່ມກໍ່ການຮ້າຍ ມາອູເຕ ເຊິ່ງເປັນກຸ່ມທີ່ສະໜັບສະໜູນ ກຸ່ມລັດອິດສະລາມ ຫຼື ໄອເອສ (IS) ກວ່າ 50 ຄົນໄດ້ບຸກຍຶດ ຂອບເຂດພື້ນທີ່ໃນເມືອງ ມາຣາວີ ທາງຕອນໃຕ້ຂອງຟິລິບປິນຕັ້ງແຕ່ຕອນບ່າຍຂອງມື້ວານນີ້ (23 ພຶດສະພາ 2017) ເຮັດໃຫ້ເກີດການປະທະກັນຂຶ້ນລະຫວ່າງກຸ່ມກໍ່ການຮ້າຍດັ່ງກ່າວກັບເຈົ້າໜ້າທີ່ທະຫານ-ຕໍາຫຼວດຂອງຟິລິບປິນ. ກຸ່ມກໍ່ການຮ້າຍໄດ້ວາງລະເບີດຫຼາຍຈຸດ ແລະ ມີການເຜົາຜານບ້ານເຮືອນປະຊາຊົນ ລວມໄປເຖິງຄຸກຂັງນັກໂທດ. ຂະນະດຽວກັນທາງການຂອງຟິລິບປິນກໍ່ໄດ້ປະກາດໃຫ້ປະຊາຊົນໃນເຂດພື້ນທີ່ ເຄີຟິວ ຮີບຮ້ອນອອກຈາກບ້ານເຮືອນພາຍໃນນເວລາ 5-6 ຊົ່ວໂມງກ່ອນທີ່ຈະມີການວາງລະເບີດອີກຄັ້ງທົ່ວເມືອງ ເຊິ່ງໃນເມືອງມີປະຊາກອນອາໃສຢູ່ທັງໝົດປະມານ 2 ແສນຄົນ. ທັງນີ້ພວກກຸ່ມກໍ່ການຮ້າຍໄດ້ທຳການຫຍາມໝິ່ນລັດທະບານຟິລິບປິນໂດຍການປົດທຸງຊາດຟິລິບປິນລົງ ແລ້ວແທນທີ່ດ້ວຍທຸງສີດຳ ອັນປຽບເໝືອນຕົວແທນຂອງກຸ່ມລັດອິດສະລາມ ພ້ອມກັບຍຶດຈຸດກວດກາຕ່າງໆໃນບໍລິເວນອ້ອມຮອບ.

ທ່ານ ເດລຟິນ ລໍເຣນຊານາ ລັດຖະມົນຕີກະຊວງປ້ອງກັນປະເທດຂອງຟິລິບປິນ ກ່າວວ່າ ໄດ້ຍົກກຳລັງທະຫານບຸກທຳລາຍບ່ອນລີ້ຊ່ອນຂອງຫົວໜ້າກຸ່ມກໍ່ການຮ້າຍຄົນສຳຄັນຄື ອິສນິລອນ ຮາປຼອນ ເຊິ່ງຕາມລາຍງານລະບຸວ່າເປັນຜູ້ທີ່ໄດ້ຮັບການເລືອກໃຫ້ເປັນຫົວໜ້າກຸ່ມກໍ່ການຮ້າຍໃຕ້ອິດທິພົນຂອງ ໄອເອສ ໃນພາກພື້ນອາຊີຕາເວັນອອກສຽງໃຕ້ ແລະ ກໍ່ເປັນບຸກຄົນໃນບັນຊີລາຍຊື່ຂອງຜູ້ກໍ່ໍການຮ້າຍທ່ົວໂລກທີ່ທາງກະຊວງຍຸດຕິທຳຂອງສະຫະລັດຕ້ອງການຕົວ ໂດຍມີລາງວັນນຳຈັບສູງເຖິງ 5 ລ້ານໂດລາສະຫະລັດ.

ນອກນັ້ນ, ລັດຖະມົນຕີກະຊວງຍຸດຕິທຳຂອງຟິລິບປິນ ຍັງໄດ້ກ່າວເສີມອີກວ່າ ຜົນຂອງການບຸກທຳລາຍບ່ອນລີ້ຊ່ອນຂອງຫົວໜ້າກຸ່ມກໍ່ການຮ້າຍຄັ້ງນີ້ ເຮັດໃຫ້ພວກມັນຮຽກກຳລັງເສີມຈາກກຸ່ມພັນທະມິດ ເຊິ່ງກໍ່ຄື ເດິມົວເຕ ໄດ້ສົ່ງກຳລັງມາສົມທົບເພື່ອເຂົ້າບຸກຍຶດສາລາກາງເມືອງ, ໂຮງໝໍ ແລະ ຍັງເຜົາວັດວາອາຮາມ, ຄຸກ, ສະຖານສຶກສາ ລວມເຖິງບ້ານເຮືອນຂອງປະຊາຊົນນຳອີກ.

ເຫດການປະທະກັນໃນຄັ້ງນີເຮັດໃຫ້ມີທະຫານເສຍຊີວິດ 2 ຄົນ, ຕຳຫຼວດ 1 ຄົນ ແລະ ມີຜູ້ໄດ້ຮັບບາດເຈັບອີກ 12 ຄົນ, ສ່ວນຝ່າຍກຸ່ມກໍ່ການຮ້າຍກໍ່ເສຍຊີວິດໄປຫຼາຍສົບເຊັ່ນກັນ ແຕ່ພວກມັນໄດ້ຍຶດເມືອງມາຣາວີເອົາໄວ້, ໄຟຟ້າກໍ່ຖືກຕັດຂາດທົ່ວເມືອງ, ເຮັດໃຫ້ເກີດຄວາມວຸ້ນວາຍໄປທົ່ວທຸກສາລະທິດ ແລະ ຮ້າຍແຮງໄປກວ່ານັ້ນຄືມີມືປືນດັ່ງຊຸ່ມຍິງໄລຍະໄກຢູ່ເຕັມໄປໝົດ.

ໃນທາງດຽວກັນ, ທ່ານ ອາລັນ ປີເຕີ້ ຄາເຍຕາໂນ ລັດຖະມົນຕີກະຊວງການຕ່າງປະເທດຂອງຟິລິບປິນເອງກໍ່ໄດ້ເປີດເຜີຍວ່າ ໄດ້ມີການແຈ້ງໄປຍັງລັດຖະມົນຕີກະຊວງການຕ່າງປະເທດຂອງລັດເຊຍໃຫ້ຮັບຊາບເຖິງເລື່ອງການຫຼຸດພາລະກິດຢ້ຽມຢາມນະຄອນຫຼວງມົສກູຂອງປະທານາທິບໍດີ ດູເຕີເຕ ແລ້ວ ເນື່ອງຈາກຈະຕ້ອງເດີນທາງກັບປະເທດກ່ອນກຳນົດເພື່ອຮັບມືກັບສະຖານນະການຮຸ້ນແຮງທີ່ເກີດຂຶ້ນໃນເກາະມິນດາເນົາ.

Be the first to comment

Leave a Reply

Your email address will not be published.


*