ສປປ ລາວ ກັບຍຸດທະສາດການປ່ຽນ Land-Locked ໃຫ້ກາຍເປັນ Land-linked

ຮູ້ ຫຼື ບໍ່ວ່າຂໍ້ດີຂອງການທີ່ບໍ່ມີຊາຍແດນຕິດກັບທະເລນັ້ນມີຫຍັງແດ່?

ປະເທດລາວ ມີເນື້ອທີ່ທັງໝົດ 286,000 ຕາລາງກິໂລແມັດ, ມີປະຊາກອນທັງໝົດເກືອບ 7 ລ້ານຄົນ, ລັກສະນະພູມີປະເທດສ່ວນໃຫຍ່ແມ່ນພື້ນທີ່ທີ່ຫຸ້ມລ້ອມໄປດ້ວຍພູສູງ ແລະ ບໍ່ມີຊາຍແດນຕິດກັບທະເລ.

ເນື່ອງຈາກປະເທດເຮົາບໍ່ມີຊາຍແດນຕິດກັບທະເລຈິ່ງເຮັດໃຫ້ເຮົາເສຍປຽບທາງດ້ານໂລຈິສຕິກ ແລະ ການປະມົງທີ່ມີບົດບາດສຳຄັນຕໍ່ກັບການພັດທະນາ-ຂະຫຍາຍຕົວຂອງປະເທດ. ແຕ່ຮູ້ ຫຼື ບໍ່ວ່າຂໍ້ດີຂອງການທີ່ບໍ່ມີຊາຍແດນຕິດກັບທະເລນັ້ນຄືປະເທດເຮົາຈະບໍ່ຄ່ອຍເກີດພາຍຸຄືກັນກັບປະເທດອື່ນ ແລະ ເຖິງແມ່ນວ່າປະເທດເຮົາຈະບໍ່ມີຊາຍແດນຕິດກັບທະເລນໍ້າ ແຕ່ກໍ່ຢູ່ທ່າມກາງທະເລຄົນຂະໜາດມະຫຶມາ, ທີ່ສຳຄັນລັດທະບານເຮົາກຳລັງຖືເອົາຍຸດທະສາດການພັດທະນາຈຸດອ່ອນໃຫ້ກາຍເປັນຈຸດແຂງ ໂດຍການປ່ຽນແປງປະເທດໃຫ້ກາຍເປັນຈຸດເຊື່ອມຕໍ່ສູນກາງກັບບັນດາປະເທດໃກ້ຄຽງ ແລະ ພາກພື້ນ.

ໂຄງການສ້າງທາງລົດໄຟຄວາມໄວສູງໃນລາວ ຖືເປັນໂຄງການໃຫຍ່ຂອງລັດທະບານ ທີ່ຈະນຳເອົາຄວາມທັນສະໄໝມາສູ່ປະເທດກໍ່ຄືປະຊາຊົນລາວທີ່ຕັ້ງແຕ່ບູຮານນະການມາບໍ່ເຄີຍມີ, ການມາຂອງເສັ້ນທາງລົດໄຟຄວາມໄວສູງຈະຊ່ວຍໃຫ້ການເດີນທາງໄປມາສະດວກສະບາຍຂຶ້ນ, ໃຊ້ເວລາສັ້ນ ແລະ ຍັງຊ່ວຍປະຢັດຕົ້ນທຶນນຳອີກ. ລອງຄິດເບິ່ງວ່າຖ້າບ້ານເຮົາມີລົດໄຟເຊື່ອມຕໍ່ກັບບັນດາປະເທດ ທັງ 5 ທີ່ມີຊາຍແດນຕິດຈອດກັນ ນັ້ນກໍ່ໝາຍຄວາມວ່າ ຈະມີການຫຼັ່ງໄຫຼຂອງຜູ້ຄົນ ຕະຫຼອດທັງສິນຄ້າ ແລະ ບໍລິການຕ່າງໆກໍ່ຈະຖືກໂຫຼດຜ່ານ ຫຼື ຂົນສົ່ງຜ່ານເສັ້ນທາງນີ້ເພາະຂໍ້ໄດ້ປຽບດັ່ງທີ່ໄດ້ກ່າວມາຂ້າງເທິງ ເຊິ່ງຈະເຮັດໃຫ້ລາວເຮົາໄດ້ປະໂຫຍດຈາກຈຸດນີ້ຢ່າງມະຫາສານທາງດ້ານເສດຖະກິດ ເປັນຕົ້ນແມ່ນ:
  1. ມີລາຍຮັບຈາກການເກັບຄ່າທຳນຽມໃນຖານະທີ່ເປັນປະເທດທາງຜ່ານ.
  2. ໄດ້ຮັບປະໂຫຍດຈາກການເກັບພາສີສິນຄ້າ ແລະ ບໍລິການສູງຂຶ້ນ.
  3. ປະຊາຊົນລາວຈະມີວຽກເຮັດງານທຳເພີ່ມຂຶ້ນ ເຊິ່ງນັ້ນໝາຍເຖິງການຫຼຸດລົງຂອງຄົນຫວ່າງງານ.
  4. ຂະແໜງການທ່ອງທ່ຽວ ແລະ ໂຮງແຮມ ຫຼື ທຸລະກິດບໍລິການຈະຂະຫຍາຍຕົວແຮງ
  5. ການລົງທຶນຈະຖືກກະຈາຍລົງສູ່ທ້ອງຖິ່ນຫຼາຍຂຶ້ນ
  6. ພື້ນຖານໂຄງລາງຈະໄດ້ຮັບການປັບປຸງ (ເພື່ອຮອງຮັບການໄຫຼເຂົ້າຂອງນັກທ່ອງທ່ຽວ)
  7. ລະບົບການເງິນ-ການທະນາຄານຈະໄດ້ຮັບການພັດລະນາໃຫ້ທັນສະໄໝກວ່າເກົ່າ

ຍ້ອນວິໃສທັດຂອງຜູ້ນຳເຮົາໃຕ້ການຊີ້ນຳຂອງພັກປະຊາຊົນ ປະຕິວັດລາວ ອັນຖືກຕ້ອງ ແລະ ສະຫຼາດສ່ອງໃສ ນຳພາປະເທດຊາດຫຼຸດພົ້ນອອກຈາກຄວາມທຸກຍາກເທື່ອລະກ້າວຢ່າງມັ້ນຄົງຖາວອນ. ໃນມື້ນີ້, ປະເທດລາວຂອງພວກເຮົາພວມສູ້ຢັນກັບຄວາມທ້າຍທາຍທີ່ເປັນທັງໂອກາດ ແລະ ອຸປະສັກ, ອາດມີທັງສຽງວິພາກວິຈານທັງໃນທາງບວກ ແລະ ທາງລົບ ແຕ່ພາລະກິດໃນການປົກປັກຮັກສາ ແລະ ສ້າງສາພັດທະນາປະເທດຊາດຍັງຄົງດຳເນີນຕໍ່ໄປຢ່າງເປັນຮູບປະທຳ. ຜ່ານທຸກການປະຕິຮູບປະເທດທັງໄລຍະຜ່ານມາກໍ່ຄືປັດຈຸບັນພຽງບໍ່ພໍເທົ່າໃດປີ ປະເທດເຮົາກໍ່ມີໂສມໜ້າໃໝ່ອັນເປັນຄວາມເອກອ້າງທະນົງໃຈຂອງປວງຊົນລາວທົ່ວທັງຊາດ ເຊິ່ງສະແດງອອກໃນຫຼາຍໆດ້ານ. “ກຸງໂຣມ ບໍ່ສາມາດສ້າງສຳເລັດໃນມື້ໜຶ່ງວັນດຽວສັນໃດ ເມືອງລາວກໍ່ບໍ່ອາດເຮັດໃຫ້ຈະເລີນໄດ້ພາຍໃນຊົ່ວຂ້າມຄືນສັນນັ້ນ”.

Be the first to comment

Leave a Reply

Your email address will not be published.


*