ເຖິງທີເອົາຄືນ…! ລັດທະບານລັດເຊຍ ສັ່ງຫ້າມ Wechat ໃຫ້ບໍລິການພາຍໃນປະເທດຢ່າງເດັດຂາດ

ທີ່ຜ່ານຫຼາຍທ່ານທີ່ເຄີຍຕິດຕາມຂ່າວສານວົງການໄອທີ ກໍ່ຄົງພໍຮູ້ ຫຼື ຄົງເຄີຍໄດ້ຍິນມາບໍ່ຫຼາຍກໍ່ໜ້ອຍກ່ຽວກັບສື່ສັງຄົມອອນໄລນ໌ບໍ່ວ່າຈະເປັນເວັບໄຊທ໌ ກໍ່ຄືບັນດາແອັບພຼິເຄຊັ່ນຕ່າງໆທີ່ມີໄວ້ສຳລັບຕິດຕໍ່ສືສານ ຫຼື ຕິດຕາມການເຄື່ອນໄຫວຂອງໝູ່ເພື່ອນ (Social Media Apps) ທີ່ຖືກລັດຖະບານຈີນບຼອ໋ກ (Block) ຫຼື ຫ້າມໃຫ້ບໍລິການໃນປະເທດຈີນຢ່າງເດັດຂາດ ຍົກເວັ້ນບາງບໍລິການທີ່ເປັນຂອງຈີນເອງເທົ່ານັ້ນ.

ບັນດາບໍລິສັດບໍ່ວ່າຈະເປັນ Google, Facebook, Twitter… ເຊິ່ງລ້ວນແລ້ວແຕ່ເປັນບໍລິສັດຂະໜາດໃຫຍ່ລະດັບໂລກ, ມີຜູ້ໃຊ້ຫຼາຍພັນລ້ານຄົນ ຕ່າງກໍ່ຜິດຫວັງກັນຖ້ວນໜ້າເພາະວ່າລັດຖະບານຈີນບໍ່ອະນຸຍາດໃຫ້ມີການເປີດບໍລິການພາຍໃນປະເທດໄດ້ ຍ້ອນເຫດຜົນທີ່ລັດທະບານຈີນຊອກຫາມາອ້າງຕ່າງໆນາ.

ຫຼ້າສຸດເມື່ອອາທິດທີ່ຜ່ານມານີ້ເອງ, Wechat ແອັບພຼິເຄຊັ່ນຊື່ດັງຈາກແດນມັງກອນ ພາຍໃຕ້ການບໍລິຫານໂດຍບໍລິສັດ Tencent ທີ່ມີຜູ້ເຂົ້າໃຊ້ງານທົ່ວໂລກ 900 ກວ່າລ້ານຄົນຕໍ່ວັນກໍ່ໄດ້ຖືກລັດທະບານລັດເຊຍເອົາຄືນ ໂດຍການສັ່ງຫ້າມ ຫຼື ບຼ໋ອກ ບໍ່ໃຫ້ມີການດຳເນີນງານ ແລະ ໃຫ້ບໍລິການ Wechat ທຸກຮູບແບບພາຍໃນປະເທດ ເຊິ່ງເຈົ້າໜ້າທີ່ຂັ້ນສູງຈາກໜ່ວຍງານຄຸ້ມຄອງ ແລະ ເຝົ້າລະວັງການສື່ສານແຫ່ງຊາດຂອງລັດເຊຍໄດ້ລະບຸວ່າ: “Wechat ໄດ້ເຮັດຜິດກົດໝາຍກ່ຽວກັບຂໍ້ມູນຂ່າວສານ ແລະ ຄວາມປອດໄພທາງອິນເຕີເນັດ ມາດຕາ 15.4 ວ່າດ້ວຍການລະບຸຄວາມຮັບຜິດຊອບຂອງແພຼທຟອມ (Platform) ກະຈາຍຂໍ້ມູນຂ່າວສານຫຼາຍປະການ ອີກເຫດຜົນໜຶ່ງຄືຜູ້ໃຫ້ບໍລິການອອນໄລນ໌ທຸກຮູບແບບຕ້ອງໄດ້ມີການຈົດທະບຽນຖືກຕ້ອງຕາມກົດໝາຍຢ່າງຄັກແນ່ ແຕ່ Wechat ບໍ່ໄດ້ໃຫ້ຄວາມສໍາຄັນກັບກົດໝາຍຂອງລັດເຊຍເລີຍ”. ທັງນີ້ ລັດເຊຍກໍ່ເຄີຍສັ່ງບຼ໋ອກບໍລິການຍອດນິຍົມອື່ນໆມາແລ້ວເຊັ່ນ: LINE ແລະ BBM ເປັນຕົ້ນ.

ການຕັດສິນໃຈຂອງລັດທະບານລັັດເຊຍໃນຄັ້ງນີ້ໄດ້ສົ່ງຜົນກະທົບຕໍ່ກັບຊາວຈີນທີ່ເຮັດວຽກຢູ່ໃນລັດເຊຍໂດຍກົງ ເພາະຊາວຈີນນິຍົມກັນໃຊ້ Wechat ຫຼາຍ ເນື່ອງຈາກເຂົາເຈົ້າບໍ່ສາມາດຕິດຕໍ່ສື່ສານກັນຜ່ານຊ່ອງທາງນີ້ໄດ້ເລີຍ. ຢ່າງໃດກໍ່ຕາມທາງ Tencent ເຈົ້າຂອງ Wechat ກໍ່ໄດ້ສະແດງຄວາມຮູ້ສຶກເສຍໃຈເປັນຢ່າງຍິ່ງພ້ອມທັງກ່າວວ່າ ການທີ່ Wechat ຖືກລັດທະບານລັດເຊຍສັ່ງບຼ໋ອກໃນຄັ້ງນີ້ເກີດຈາກ “ຄວາມເຂົ້າໃຈບໍ່ກົງກັນ” ແລະ ບໍລິສັດກໍ່ກໍາລັງພະຍາຍາມຕິດຕໍ່ເຈລະຈາສື່ສານກັບທາງການຂອງລັດເຊຍຢູ່.

Be the first to comment

Leave a Reply

Your email address will not be published.


*