ເຢຍລະມັນ ສັ່ງຖອນ “ຄຳ” ຈຳນວນ 674 ໂຕນ ຈາກສະຫະລັດ ແລະ ຝຣັ່ງ ກັບຄືນປະເທດ

ທະນາຄານກາງຂອງເຢຍລະມັນ “Bundesbank” ເປີດເຜີຍວ່າ ໄດ້ມີການຂົນຍ້າຍ “ຄຳແທ່ງ” ມູນຄ່າ 2.83 ໝື່ນລ້ານໂດລາສະຫະລັດ ອອກຈາກນະຄອນຫຼວງນິວຢອກ ແລະ ນະຄອນຫຼວງປາຣີ ກັບຄືນສູ່ ແຟຣງເຟິທ ເຊິ່ງການຂົນຍ້າຍຄຳແທ່ງທັງໝົດນີ້ສຳເລັດກ່ອນກຳນົດເຖິງ 3 ປີ.

ການຂົນຍ້າຍຄຳຈຳນວນ 674 ໂຕນ ຫຼື ປະມານ 54,000 ແທ່ງ ຈາກນິວຢອກ ແລະ ປາຣີ ໄປຍັງແຟຣງເຟິທ ເຮັດໃຫ້ທະນາຄານ ບຸນເດສແບັ້ງ (ທະນາຄານກາງຂອງເຢຍລະມັນ) ນັ້ນມີຄຳໃນຄັງທັງໝົດ 3,378 ໂຕນ ເຮັດໃຫ້ເຢຍລະມັນກາຍເປັນປະເທດທີ່ມີຄຳຫຼາຍທີ່ສຸດໃນໂລກອັນດັບທີ 2 ຮອງຈາກສະຫະລັດອາເມລິກາ.

ໃນຈຳນວນຄຳ 674 ໂຕນຂອງເຢຍລະມັນທີ່ຖືກຖອນຄືນກັບປະເທດຄັ້ງນີ້ແບ່ງອອກເປັນ 300 ໂຕນທີ່ຝາກໄວ້ໃນນະຄອນຫຼວງນິວຢອກ ແລະ ອີກ 374 ໂຕນ ຝາກໄວ້ທີ່ນະຄອນຫຼວງປາຣີ ປະເທດຝຣັ່ງ ໂດຍຄຳທັງໝົດທີ່ເຢຍລະມັນສັ່ງໃຫ້ດຶງກັບຄືນມີມູນຄ່າກວ່າ 1 ໃນ 5 ຂອງຄຳສຳຮອງທີ່ເຢຍລະມັນມີທັງໝົດ.

ປັດຈຸບັນ ຄຳຂອງເຢຍລະມັນຈຳນວນ 45% ຖືກນຳໄປຝາກໄວ້ທີ່ທະນາຄານກາງຂອງສະຫະລັດອາເມລິກາ, ອີກ 13% ຝາກໄວ້ທີ່ທະນາຄານກາງຂອງອັງກິດ ແລະ ອີກ 11% ແມ່ນຝາກໄວ້ທີ່ທະນາຄານກາງຂອງຝຣັ່ງ. ດັ່ງນັ້ນ, ຈິ່ງເຮັດໃຫ້ທະນາຄານກາງຂອງເຢຍລະມັນມີຄຳພຽງ 31% ທີ່ຖືກຮັກສາໄວ້ໃນນະຄອນຫຼວງແຟຣງເຟິທ.

Be the first to comment

Leave a Reply

Your email address will not be published.


*