ໃນທີ່ສຸດຍອດຂາຍ Apple Watch ກໍ່ແຊງໜ້າ Rolex ຂຶ້ນເປັນອັນດັບໜຶ່ງຂອງໂລກຮຽບຮ້ອຍແລ້ວ

ປີທີ່ຜ່ານມາ, ບໍລິສັດ Apple Inc. ໄດ້ປະກາດວ່າຍອດຂາຍ Apple Watch ເປັນອັນດັບສອງຂອງໂລກຮອງຈາກ Rolex.

ໃນງານ Apple Special Event ທີ່ໄດ້ຈັດຂຶ້ນໃນວັນທີ 12 ກັນຍາ 2017 ຜ່ານມານີ້, Tim Cook ປະກາດວ່າ Apple Watch ເປັນໂມງທີ່ຂາຍດີທີ່ສຸດໃນໂລກ ແລະ ໄດ້້ເອົາຊະນະ Rolex ເປັນປີທໍາອິດ, ຊະນະ Omega, Patek, Fossil ແລະ ຍີ່ຫໍ້ອື່ນໆເປັນປີທີສອງຕິດຕໍ່ກັນ.

“ເຈົ້າຂອງ Rolex ສ່ວນໃຫຍ່ມັກຊື້ Apple Watch, ແຕ່ບໍ່ແມ່ນເຈົ້າຂອງ Watch Apple ທຸກຄົນ ຈະຊື້ Rolex”

ເຖິງແມ່ນວ່າ Apple ແລະ Rolex ຈະບໍ່ປະກາດຕົວເລກຍອດຂາຍຢ່າງຊັດເຈນ ແຕ່ຂໍ້ມູນຂອງ Techcrunch ກໍ່ສາມາດປະເມີນໄດ້ວ່າ ໃນປີ 2016 ລາຍໄດ້ຂອງ Apple ຈາກການຂາຍ Apple Watch ພຽງຢ່າງດຽວແມ່ນປະມານ 6 ຕື້ໂດລາ, ໃນຂະນະທີ່ Rolex ມີລາຍໄດ້ໃນປີ 2015 ປະມານ 4.5 ຕື້ໂດລາ ຈາກການຂາຍໂມງທຸກລຸ້ນ.

ສຳລັບປີ 2016, ຖ້າຍອດຂາຍຂອງ Rolex ໃກ້ຄຽງກັນ ກໍ່ຖືວ່າໂມງທີ່ເກີດມາໄດ້ພຽງ 3 ປີ ຢ່າງ Apple Watch ກໍາລັງສ້າງສະຖິຕິຍອດຂາຍສູງຖະຫຼົ່ມທະລາຍເໜືອກວ່າຄູ່ແຂ່ງອັນດັບໜຶ່ງຄື Rolex ຜູ້ທີ່ມີປະຫວັດສາດອັນຍາວນານນັບຮ້ອຍປີໄປຕະຫຼອດການ.

Apple Watch ໄດ້ເປີດຕົວຄັ້ງທໍາອິດໃນປີ 2015 ແລະ ກໍ່ບັງເອີນທີ່ການຂະຫຍາຍຕົວຂອງການສົ່ງອອກໂມງໃນປະເທດສະວິດເຊີແລນ ຕິດລົບໃນປີ 2015, ຫຼັງຈາກທີ່ບໍ່ເຄີຍຕິດລົບມາຕັ້ງແຕ່ປີ 2009. ໃນປີ 2016 ການສົ່ງອອກໂມງຂອງສະວິດເຊີແລນ ຍັງຄົງຕິດລົບເພີ່ມອີກປະມານ 10% ເຖິງແມ່ນວ່າໃນປີ 2017 ຍອດຂາຍຈະເລີ່ມດີຂຶ້ນມາແດ່ ແຕ່ກໍ່ຖືວ່າອຸດສາຫະກໍາໂມງຂອງປະເທດສະວິດຍັງບໍ່ທັນພົ້ນພາວະວິກິດເທື່ອ.

ບາງຄົນອາດບອກວ່າໂມງຄື “ອາລົມຄວາມຮູ້ສຶກ” ຫຼາຍກວ່າ “ໜ້າທີ່ຂອງມັນຄືການບອກວັນເວລາ” ແຕ່ຫຼາຍຄົນກໍ່ບອກວ່າ “ໂມງແມ່ນເລື່ອງລາວທາງປະຫວັດສາດ” ເຊິ່ງບາງແບຣນບອກວ່າ “ໂມງແມ່ນຄວາມພາກພູມໃຈ ແລະ ຄວາມສໍາເລັດ” ບໍ່ແມ່ນ “ຂອງຫຼິ້ນ”. ແຕ່ວັນນີ້, ເຄື່ອງຫຼິ້ນດັ່ງກ່າວກຳລັງສ້າງຍອດຂາຍແຊງໜ້າຄວາມພາກພູມໃຈ ແລະ ຄວາມສຳເລັດຂອງພວກເຂົາໂດຍໃຊ້ເວລາພຽງ 3 ປີ ເທົ່ານັ້ນ.

ຫຼື Apple ຈະປ່ຽນຄວາມຄິດຂອງຄົນໄດ້ສຳເລັດແທ້? ເພາະໃນອີກມຸມໜຶ່ງໂມງລາຄາແພງກໍ່ບໍ່ໄດ້ຕ່າງຫຍັງກັບອຸປະກອນບອກເວລາລາຄາແພງ ຖ້າໃນມຸມນີ້ Apple Watch ສາມາດເຮັດຫຼາຍສິ່ງຫຼາຍຢ່າງໄດ້ດີກວ່າໂມງລາຄາແພງທົ່ວໄປ ໃນລາຄາທີ່ສົມເຫດສົມຜົນກວ່ານຳ. ມັນເປັນເລື່ອງທີ່ຫນ້າສົນໃຈວ່າໂມງແບຣນດັງຈາກທົ່ວໂລກຈະມີການປັບຕົວກັບຄວາມທ້າທາຍໃໝ່ນີ້ຄືແນວໃດ? ຈະຍອມປັບຕົວ ແລະ ຈະທັນການຫຼືບໍ່?.

ຕອນທີ່ Apple Watch ອອກມາໃໝ່ໆ, ບໍ່ມີໃຜຄິດວ່າ Apple Watch ຄືຄູ່ແຂ່ງຈິ່ງບໍ່ຄ່ອຍມີໃຜສົນໃຈເທົ່າໃດ ແລະ ທີ່ໜ້າແປກໃຈໄປກວ່ານັ້ນຄືແມ່ນກະທັ້ງຕອນນີ້ກໍ່ຍັງເບິ່ງຄ້າຍກັບວ່າບໍ່ມີໃຜຄິດວ່າມັນເປັນຄູ່ແຂ່ງຢູ່ດີ. Jony Ive ເຄີຍໄດ້ກ່າວໄວ້ໃນປີ 2014 ວ່າ “Switzerland is f**ked” ຫຼື ສິ່ງທີ່່ເຮົາເຫັນໃນຕອນນີ້ອາດເປັນພຽງບົດທຳອິດທີ່ Jony Ive ເຄີຍກ່າວໄວ້.

Be the first to comment

Leave a Reply

Your email address will not be published.


*