ຄິດແບບ LINE ຈິ່ງມີຍອດຂາຍສະຕິກເກີ້ປີລະ 8,700 ລ້ານ

ຮູ້ ຫຼື ບໍ່ວ່າໃນແຕ່ລະວັນມີຄົນສົ່ງສະຕິກເກີ້ LINE ວັນລະ 430 ລ້ານຕົວ ແລະ ຖ້າທຽບກັບຍອດຂາຍ 8,700 ລ້ານເຢນແລ້ວ LINE ຄົງເປັນບໍລິສັດທີ່ມີລາຍໄດ້ຈາກການຂາຍສະຕິກເກີ້ສູງທີ່ສຸດໃນໂລກຢ່າງແນ່ນອນ ທີ່ສຳຄັນບັນດາສະຕິກເກີ້ເຫຼົ່ານັ້ນລ້ວນເປັນ “ສື່ດິຈິຕອລ” ທີ່ເກືອບບໍ່ມີຕົ້ນທຶນການຜະລິດເລີຍ.

LINE ມີລາຍໄດ້ໃນປີ 2016 ປະມານ 8,700 ລ້ານເຢນ ເຊິ່ງແບ່ງທີ່ມາຫຼັກໆຂອງລາຍໄດ້ ຄືດັ່ງນີ້:

  1. ລາຍໄດ້ຈາກການໂຄສະນາ ປະມານ 38.6% ຫຼື ຄິດເປັນ 3,358.2 ລ້ານເຢນ
  2. ລາຍໄດ້ຈາກເກມ ປະມານ 31.8% ຄິດເປັນເງິນເທົ່າກັບ 2,776.6 ລ້ານເຢນ
  3. ລາຍໄດ້ຈາກການຂາຍສະຕິກເກີ້ ປະມານ 20.9% ຫຼື ທຽບເທົ່າ 1,818.3 ລ້ານເຢນ
  4. ລາຍໄດ້ຈາກການດຳເນີນງານສ່ວນອື່ນ ປະມານ 8.7% ຫຼື 756.9 ລ້ານເຢນ

ຫຼັກການ ແລະ ວິທີຄິດຂອງ LINE

LINE ມີຄວາມເຂົ້າໃຈໃນຕະຫຼາດຂອງຕົນເອງເປັນຢ່າງດີ ເຊິ່ງລາຍໄດ້ຫຼັກຂອງບໍລິສັດ 73% ແມ່ນມາຈາກປະເທດຍີປຸ່ນ ທີ່່ເຮົາຕ່າງກໍ່ຮູ້ຈັກກັນດີຢູ່ວ່າຂຶ້ນຊື່ເລື່ອງກາຕູນໜ້າຮັກໆຢູ່ແລ້ວ. ໃນປະເທດຍີປຸ່ນ ກາຕູນບໍ່ໄດ້ເປັນພຽງກາຕູນເທົ່ານັ້ນ ແຕ່ມັນຄືວິຖີ, ຄືຄວາມຜູກພັນ ແລະ ຄືສິ່ງທີ່ຂາດບໍ່ໄດ້ສຳລັບຄົນຍີປຸ່ນໄປແລ້ວ. ດັ່ງນັ້ນ, ຈິ່ງບໍ່ແມ່ນເລື່ອງແປກທີ່ຄົນຍີປຸ່ນຈະຍອມຈ່າຍເງິນເພື່ອຊື້ສະຕິກເກີ້ທີ່ຕົວເອງມັກ.

ສະຕິກເກີ້ຂອງ LINE ນຳສະເໜີເລື່ອງລາວທີ່ໃກ້ຕົວ ຫຼື ອາດເວົ້າໄດ້ວ່າເປັນການນຳເອົາກິດຈະກຳໃນຊີວິດປະຈຳວັນຂອງຄົນມານຳສະເໜີຜ່ານຕົວກາຕູນ ເຊິ່ງຜູ້ຄົນສ່ວນຫຼາຍກໍ່ລ້ວນແຕ່ເຄີຍຜ່ານເຫດການແບບນັ້ນມາໃນຊີວິດຢູ່ແລ້ວ ແລະ ເມື່ອມັນມີຄວາມໃກ້ຄຽງກັບຕົວເອງກໍ່ຈະເຮັດໃຫ້ເກີດອາການ “ຫຼົງມັກໂດຍບໍ່ຮູ້ຕົວ” ເນື່ອງຈາກຮູ້ສຶກວ່າບຸກຄະລິກຂອງສະຕິກເກີ້ແຕ່ລະຕົວນັ້ນປຽບເໝືອນຕົວແທນຂອງຕົນເອງ ທີ່ສາມາດໃຊ້ແທນຄຳເວົ້າ, ແທນການພິມຕົວໜັງສື ແລະ ຍັງສາມາດເປັນເຈົ້າຂອງສະຕິກເກີ້ນັ້ນໄດ້ໃນລາຄາພຽງເລັກນ້ອຍ.

ສະຕິກເກີ້ຄືວິວັດທະນາການຂອງ Emoji ແລະ ຄົນທີ່ໃຊ້ແອັພຂໍ້ຄວາມເລື້ອຍໆກໍ່ມັກຈະໃຊ້ Emoji ເພື່ອສື່ເຖິງຄວາມຮູ້ສຶກ ແລະ ອາລົມ ໂດຍສະເພາະກັບຄົນແຖບອາຊີີີເຮົາເອງກໍ່ມີ Emoji ທີ່ໄດ້ຮັບການພັດທະນາໄປໄກຫຼາຍ ແຖມຍັງມີພຽງຄົນອາຊີີເທົ່ານັ້ນທີ່່່ເຂົ້າໃຈຄວາມໝາຍ ເຊັ່ນ:  (>_<), (T_T), (-_-)…. ສະນັ້ນ, ການຂະຫຍາຍຕະຫຼາດຂອງ  LINE ກໍ່ງ່າຍໆຕາມຕະຫຼາດທີ່ນິຍົມໃຊ້ Emoji ພວກນີ້ໄປເລີຍ.

ການເປັນຍິ່ງກວ່າແອັພສົນທະນາ

ເມື່ອກ່ອນຕອນທີ່ LINE ເປີດໃຫ້ບໍລິການຄັ້ງທຳອິດ ມັນມີສະຖານະເປັນພຽງແອັພ Chat ຫຼື ແອັພສົນທະນາທົ່ວໄປ ບໍ່ໄດ້ມີຫຍັງເປັນພິເສດກວ່າແອັພອື່ນໆໃນຕະຫຼາດ. ແຕ່ດ້ວຍວິໄສທັດຂອງບໍລິສັດ LINE ໄດ້ປັບປຸງຕົວເອງດ້ວຍການເພີ່ມສະຕິກເກີ້ເພື່ອສ້າງສີສັນໃຫ້ແກ່ການສົນທະນາ ແລະ ມັນກໍ່ເປັນໄປຕາມຄາດ ເນື່ອງຈາກໄດ້ຮັບຄວາມນິຍົມຈາກຜູ້ໃຊ້ຢ່າງລົ້ນຫຼາມເພາະສະຕິກເກີ້ທີ່ LINE ໃຫ້ດາວໂຫຼດຟຣີລ້ວນມີແຕ່ຕົວທີ່ໜ້າຮັກ ທັງສາມາດສະທ້ອນການໃຊ້ຊີວິດປະຈຳວັນຂອງຄົນໄດ້ເປັນຢ່າງດີ.

ຕໍ່ມາ LINE ເລີ່ມປ່ອຍສະຕິກເກີ້ “ແບບເສຍເງິນຊື້” ໃຫ້ຜູ້ຄົນດາວໂຫຼດ ເຊິ່ງມັນເປັນສິ່ງຈຳເປັນທີ່ບໍລິສັດຕ້ອງເຮັດ ເພາະບໍລິສັດຕ້ອງມີພາລະໃນການແບກຫາບຄ່າໃຊ້ຈ່າຍໃນການດຳເນີນງານ, ເງິນເດືອນພະນັກງານ ຫຼື ແມ່ນກະທັ້ງຄ່າບຳລຸງຮັກສາ Server ແລະ ຄ່າໃຊ້ຈ່າຍອື່ນໆ ເນື່ອງຈາກ LINE ເປັນ Free App ແຖມຍັງບໍ່ຍອມໃຫ້ມີໂຄສະນາໃນແອັພອີກ ຈິ່ງເຮັດໃຫ້ LINE ບໍ່ມີລາຍໄດ້ຈາກໂຄສະນາເລີຍ (ປົກກະຕິແອັພຟຣີສ່ວນໃຫຍ່ຈະມີລາຍໄດ້ຈາກໂຄສະນາທີ່ Google ແລະ Apple ປ່ອຍສະແດງໃນແອັພ).

ຖ້າສິນຄ້າດີແທ້ ຄົນຍ່ອມຈົກເງິນຊື້” ອາດເປັນວະລີທີ່ຖືກຕ້ອງ ເພາະສະຕິກເກີ້ຂອງໄລນ໌ທີ່ວາງຂາຍແບບ In-App-Purchase ໄດ້ສ້າງລາຍໄດ້ໃຫ້ກັບບໍລິສັດຢ່າງງາມ. ເມື່ອເຫັນໂອກາດດັ່ງກ່າວ LINE ຈິ່ງພະຍາຍາມຫາທາງອອກໃຫ້ກັບບໍລິສັດເພື່ອທີ່ຈະບໍ່ຕ້ອງຫັກຄ່າສ່ວນແບ່ງໃຫ້ກັບ AppStore ແລະ PlayStore ເນື່ອງຈາກສ່ວນແບ່ງຂອງຍອດຂາຍສະຕິກເກີ້ແຕ່ລະຄັ້ງຕ້ອງຫັກຄ່າສ່ວນແບ່ງໃຫ້ຮ້ານຄ້າດັ່ງກ່າວ 30% ສ່ວນທີ່ເຫຼືອອີກ 70% ເປັນຂອງບໍລິສັດ.

ບັນຫານີ້ເຮັດໃຫ້ LINE ເປີດຕົວເວັບໄຊທ໌ store.line.me ເພື່ອເປັນຊ່ອງທາງໃນການຊື້ສະຕິກເກີ້ໂດຍບໍ່ຜ່ານ AppStore ແລະ PlayStore ທີ່ສຳຄັນລາຍໄດ້ທັງໝົດກໍ່ຈະຕົກເປັນຂອງບໍລິສັດພຽງຜູ້ດຽວ. ລູກຄ້າສາມາດຊື້ສະຕິກເກີ້ໄດ້ຜ່ານທາງໜ້າເວັບແລ້ວໄປດາວໂຫຼດໃນຕົວແອັພ LINE ຜ່ານ Function ປະຫວັດການຊື້. ນີ້ຖືວ່າເປັນການແກ້ບັນຫາໄດ້ຢ່າງຖືກຈຸດຂອງ LINE ແລະ ສະແດງໃຫ້ເຫັນເຖິງຄວາມຄິດທີ່ສຸດແສນສະຫຼາດຂອງຄົນຍີປຸ່ນ.

ເພື່ອຮັກສາຖານລູກຄ້າ ແລະ ຕະຫຼາດຂອງ LINE ເອົາໄວ້ບໍ່ໃຫ້ຖືກກືນກິນດ້ວຍແອັພໃໝ່ໆທີ່ເກີດຂຶ້ນປານດອກເຫັດໃນຕະຫຼາດ LINE ຈິ່ງໄດ້ພະຍາຍາມຜັນຕົວເອງຈາກແອພ Chat ຈົນກາຍເປັນ Platform ທີ່ມີຫຼາກຫຼາຍບໍລິການພ່ວງຕິດຢູ່ໃນແອັພ ບໍ່ວ່າຈະເປັນເກມທີ່ຕິດກັນທົ່ວບ້ານທົ່ວເມືອງ, ບໍລິການ LINE Music, LINE TV, LINE Man, LINE News (LINE Today), LINE Official Account, LINE Pay ແລະ ອື່ນໆອີກຫຼາກຫຼາຍບໍລິການ.

ປັດຈຸບັນ LINE ໄດ້ເປີດກວ້າງໃຫ້ນັກແຕ້ມກາຕູນທົ່ວໂລກໄດ້ສ້າງສັນຜົນງານ ແລະ ສົ່ງຜົນງານຂອງຕົນເອງຂຶ້ນຂາຍເທິງ LINE Store ໃນຮູບແບບ Creator Sticker ແລະ Creator Theme ໂດຍນັກອອກແບບທຸກຄົນສາມາດສ້າງສັນຜົນງານໄດ້ຕາມໃຈ ແລະ ກຳນົດລາຄາຂາຍໄດ້ຕາມໃຈອີກດ້ວຍ. ການຕັດສິນໃຈຄັ້ງນີ້ເຮັດໃຫ້ LINE ມີກຳໄລຈາກການປະກອບກິດຈະການຢ່າງມະຫາສານ ເພາະນັກອອກແບບສະຕິກເກີ້ນັ້ນຄືຜູ້ສ້າງສິນຄ້າໃຫ້ກັບບໍລິສັດໂດຍທີ່ບໍ່ຕ້ອງອອກແຮງຫາຜູ້ສະໜອງໃຫ້ລຳບາກ ຂະນະດຽວກັນກໍ່ເປັນຜູ້ນຳລູກຄ້າມາສູ່ຕະຫຼາດສະຕິກເກີ້ຂອງ LINE ຢ່າງເປັນກ້ອນກຸ່ມ ເຮັດໃຫ້ LINE ມີແຕ່ໄດ້ກັບໄດ້.

ຫາເງິນຈາກຄວາມຖະໜັດ ແລະ ຈິດຕະສາດຂອງຄົນ

ຫຼາຍຄົນອາດເບິ່ງວ່າ ສະຕິກເກີ້ເປັນສິ່ງທີ່ “ບໍ່ຈຳເປັນ” ແຕ່ເຄີຍຄິດໃນມຸມກັບເບິ່ງບໍ່ວ່າເປັນຫຍັງຄົນຈິ່ງຍອມຈ່າຍເງິນເພື່ອສິ່ງທີ່ບໍ່ຈຳເປັນຄືແນວນີ້ ເຊິ່ງບາງທີີເຮົາກໍ່ຄວນລອງຄິດເບິ່ງວ່າ: “ຄວາມຈຳເປັນ” ຂອງແຕ່ລະຄົນອາດຖືກຈຳກັດຄວາມ ຫຼື ນິຍາມບໍ່ຄືກັນກໍ່ເປັນໄດ້.

ເຖິງແມ່ນວ່າສະຕິກເກີ້ອາດຈະບໍ່ຕອບໂຈດຄວາມຕ້ອງການດ້ານ Function ແຕ່ມັນອາດເປັນທີ່ຕ້ອງການດ້ານ Emotion ເພາະໃນຊີວິດຈິງຄົນເຮົາບໍ່ໄດ້ຕ້ອງການພຽງກິນອີ່ມນອນຫຼັບ ແຕ່ຍັງຕ້ອງການຄວາມສຸກທາງດ້ານຈິດໃຈນຳ. ພຽງເງິນເລັກໜ້ອຍກໍ່ສາມາດໃຊ້ສ້າງຄວາມສຸກໃຫ້ກັບຕົນເອງ ແລະ ຄົນຮອບຂ້າງໄດ້ ແນ່ນອນວ່າມັນບໍ່ແມ່ນເລື່ອງຍາກເລີຍທີ່ຄົນຈະຍອມຈ່າຍເງິນຊື້ສິ່ງທີ່ພວກເຂົາເອີ້ນວ່າ: “ຄວາມສຸກ”.

Be the first to comment

Leave a Reply

Your email address will not be published.


*