Nokia ທວງຄືນບັນລັງວົງການມືຖື ດ້ວຍການເປີດຕົວໂທລະສັບມືຖື “ລຸ້ນໃໝ່ໃນເຄົ້າເດີມ”

ໃນງານມະຫະກຳມືຖື ແລະ ການສື່ສານໂທລະຄົມມະນາຄົມໂລກ ຫຼື MWC 2017 (Mobile World Congress) ທີ່ຈັັດຂຶ້ນໃນເມືອງ ບາເຊໂລນາ ປະເທດສະເປນ

ລະຫວ່າງວັນທີ 27 ກຸມພາ-2 ມີນາ 2017 ນີ້, ໄຮໄລທ໌ ສຳຄັນຂອງງານທີ່ສື່ມວນຊົນຕ່າງຊາດຕ່າງກໍ່ໃຫ້ຄວາມສົນໃຈຄືການກັບມາເກີດໃໝ່ຂອງ “ໂນເກຍ 3310” ນັ້ນເອງ. ໃຜຈະຄິດວ່າ Nokia ທີ່ປັດຈຸບັນຢູ່ພາຍໃຕ້ການດູແລຂອງ HMD ຈະຄິດຕ່າງດ້ວຍການຈັບເອົາໂທລະສັບມືຖືໃນຕຳນານຢ່າງ Nokia 3310 ທີ່ຮູບຮ່າງຄ້າຍກັບກ້ອນດິນຈີ່ ແຕ່ມີດີທີ່ຄວາມແຂງແຮງອຶດທົນ (ຢ່າຄິດເລິກ) ກັບມາ Remake ໃໝ່ໃຫ້ທັນສະໄໝກວ່າເກົ່າ (ຕິເບາະ) ແລ້ວຍັດລະບົບປະຕິບັດການ S30 ລົງໄປໃຫ້ມັນຍັງຄົງເຫຼືອຄວາມເປັນແບຣນໂນເກຍຢ່າງເຕັມຮູບແບບ. ໂດຍ Nokia 3310 ລຸ້ນ 2017 ນີ້ມາພ້ອມກັບໜ້າຈໍຄວາມລະອຽດ 2.4 ນິ້ວ (QVGA), ຮອງຮັບ 2 ຊິມ, ມີໜ່ວຍຄວາມຈຳພາຍໃນ 16MB (ແຕ່ສາມາດເພີ່ມໜ່ວຍຄວາມຈຳພາຍນອກ ຫຼື microSD Card ໄດ້ສູງສຸດເຖິງ 32GB. ສິ່ງທີ່ Nokia 3310 ລຸ້ນ 2017 ຖືກປັບຮູບໂສມ ແລະ ເພີ່ມລູກຫຼິ້ນເຂົ້າມາຄືກ້ອງຖ່າຍຮູບ ເຊິ່ງກ້ອງຖ່າຍຮູບດ້ານຫຼັງມີຄວາມລະອຽດ 2 ລ້ານພິກເຊລ ພ້ອມໄຟແຟຼຊ (Flash), ສ່ວນແບັດເຕີຣີ່ນັ້ນສາມາດເປີດເຄື່ອງລໍຖ້າຮັບສາຍໄດ້ສູງສຸດ 1 ເດືອນຕໍ່ການສາກໄຟໜຶ່ງຄັ້ງ (ງານດີ).

ສິ່ງທີ່ເປັນເອກະລັກຂອງໂນເກຍເກືອບທຸກລຸ້ນ ໂດຍສະເພາະແມ່ນ Nokia 3310 ນັ້ນກໍ່ຄືເກມງູ ແລະ ມັນກໍ່ບໍ່ໄດ້ຖືກປະໃຫ້ຕາຍໄປກັບອະດີດ ເພາະມັນໄດ້ຖືກບັນຈຸລົງໃນຕົວເຄື່ອງ ແຕ່ໃຫ້ຄວາມຮູ້ສຶກໃໝ່ເທິງໜ້າຈໍສີ, ທີ່ມີສຽງເອີ້ນເຂົ້າ (Ring Tone) ຂອງໂນເກຍເອງທີ່ແອດມີນເຊື່ອວ່າຫຼາຍຄົນຄົງຄຸ້ນຫູກັນດີ. ນອກຈາກນີ້, Nokia 3310 ລຸ້ນໃໝ່ຍັງຮອງຮັບ Bluetooth 3.0 ອີກທັງຍັງສາມາດເຊື່ອມຕໍ່ເທິງເຄືອຂ່າຍ 2.5G ໄດ້ ແຕ່ເປັນທີ່ໜ້າເສຍດາຍທີ່ລຸ້ນນີ້ບໍ່ມີ WiFi ຕິດຕົວມາໃຫ້. ສຳລັບລາຄາຄ່າຕົວຂອງ Nokia 3310 ແມ່ນຢູ່ທີ່ 49 ຢູໂຣ ຫຼື ປະມານ 4 ແສນກວ່າກີບ, ມີ 4 ສີໃຫ້ເລືອກຄື: ສີແດງ, ສີເຫຼືອງ, ສີເທົາເງິນ ແລະ ສີຟ້າເຂັ້ມ ແຕ່ຈະວາງຈຳໜ່າຍໃນຊ່ວງເດືອນ ເມສາ 2017 ນີ້.

Be the first to comment

Leave a Reply

Your email address will not be published.


*